Hezbolah je najmoćnija oružana snaga u Libanu, ali i uticajna šiitska politička stranka.

Ima značajno prisustvo i u libanskom parlamentu i vladi.

Grupa je proglašena terorističkom organizacijom u Izraelu i mnogim zapadnim zemljama.

Posebno se istakla 1980-ih pruživši otpor Izraelu, čije su snage okupirale Liban tokom građanskog rata u zemlji između 1975. i 1990. godine.

U oktobru prošle godine su Izraelske odbrambene snage (IDF) gađale nekoliko ogranaka Al-Kard Al-Hasana (AKAH), navodeći da je udruženje paravan za Hezbolah, koji podržava Iran u finansiranju njihovih aktivnosti.

AKAH negira ove tvrdnje i insistira da je finansijska organizacija civilni entitet koji nudi male kredite ljudima kojima su potrebni.

Više od dva mjeseca sukoba Hezbolaha i Izraela u Libanu 2024. godine dovelo je do široko rasprostranjenog razaranja u oblastima gdje je snažno prisustvo ove grupe koju podržava Iran.

Borbe su se okončale sporazumom o primirju, koji je stupio na snagu 27. novembra prošle godine, poslije pada Asadovog režima u susjednoj Siriji.

Ovi događaji mogli bi da imaju ogroman uticaj na finansiranje Hezbolaha i njegovu sposobnost da nabavi vojnu opremu.

BBC News na arapskom je procijenio sve što se zna o glavnim izvorima prihoda Hezbolaha kao i njegove finansijske mreže u Libanu i svijetu.

Iranske veze

Američki Stejt department je 2022. procijenio da je Iran Hezbolahu slao čak 700 miliona dolara godišnje, prenosi RTCG.

Pokojni lider Hezbolaha Hasan Nasralah, ubijen u izraelskom vazdušnom napadu u septembru 2024, hvalio se u govoru iz osam godina ranije da finansiranje grupa najviše potiče iz Irana.

Nije iznio nikakve konkretne finansijske brojke.

"Naš budžet, plate, troškovi, hrana, voda, oružje i projektili potiču iz Islamske Republike Irana", rekao je on.

Iran finansira Hezbolah preko vlastite moćne Islamske revolucionarne garde (IRGC), koja je pomogla u osnivanju ove libanske grupe 1980-ih.

Iranska revolucionarna garda je i glavni snabdijevač Hezbolaha oružjem, među njima i naprednim raketama i dronovima.

I dok su iranska sredstva možda činila većinu Hezbolahovog budžeta u prošlosti, grupa se sve više oslanja na druge izvore, tvrdi Hanin Gadar, viša stručna saradnica iz Vašingtonskog instituta za bliskoistočnu policiju.

"Zbog sankcija Iranu, Iranci više nisu mogli da šalju iste količine novca Hezbolahu", objašnjava ona.

Grupa dopunjava prihode iz Irana preko širokog dijapazona nelegalnih finansijskih aktivnosti, među njima i od pranja novca, objašnjava Metju Levit, autor knjige "Hezbolah: Globalni otisak libanske božje stranke".

Al-Kard Al-Hasan

AKAH je jedna takva organizacija, optužena za pranje novca za Hezbolah.

Udruženje je postalo ključni dio Hezbolahove mreže pružanja socijalnih usluga.

Prije izraelskih napada na njegove kancelarije 20. oktobra prošle  godine, imalo je više od 30 ogranaka, često lociranih u prizemlju stambenih zgrada.

Omogućavala je ljudima da uzimaju beskamatni kredit u američkim dolarima, podržano u zlatu ili od žiranta, i da otvaraju račune za štednju.

Nasralah je u govoru iz 2021. rekao je AKAH obezbijedio 3,7 milijardi dolara kredita za 1,8 miliona ljudi u Libanu otkako je osnovan ranih 1980-ih.

Oko 300.000 ljudi je u tom periodu uzelo kredit od njega.

"Cilj banke nije dobit. Ona nudi finansijsku pomoć prevashodno njenoj bazi podrške. Mada vjerovatno učestvuje u pranju novca za Hebolahove neformalne ekonomske aktivnosti", kaže Džozef Daher, akademik i autor knjige "Hezbolah: Politička ekonomija libanske Božje stranke".

Ubrzo poslije njegovih napada na AKAH, Izrael je optužio Hezbolah da koristi ovu instituciju za "finansiranje njenih terorističkih aktivnosti".

SAD su uvele sankcije organizaciji 2007, kad su američki zvaničnici rekli da Hezbolah koristi udruženje kao paravan za upravljanje njegovim finansijskim aktivnostima i da bi stekao pristup međunarodnom finansijskom sistemu.

Odgovor ogranka AKAH

AKAH je BBC-ju u vezi sa tvrdnjama o vezama udruženja sa Hezbolahom rekao da nisu finansijska ruka ekstremističke grupe, negirajući navode o pranju novca.

Udruženje tvrdi da je dio Hezbolahovog šireg institucionalnog okvira, prevashodno usredsređenog na humanitarne inicijative i one koje se bave pružanjem usluga, ali ne na finansijske transakcije ili ulaganja.

AKAH je istakao vlastitu raniju tvrdnju da nema direktne veze sa stranim organizacijama ili vladama, u šta spada i Iran.

"Mi smo dio Hezbolahovog institucionalnog sistema, ali je naš naglasak na humanitarnim i aspektima usluga, a ne na finansijskim operacijama. Nismo povezani ni sa bilo kojim inostranim nacionalnostima ili organizacijama, iranskim ili bilo kojim drugim", dodali su.

Udruženje je ponovilo posvećenost transparentnosti i naglasak na humanitarnoj pomoći, nazvavši ova pitanja "nesporazumima" o njegovoj dobrotvornoj prirodi.