Popularne aplikacije, kao što su Mesendžer, Instagram ili TikTok troše bateriju kako zbog svog sadržaja, tako i zbog reklama – prije svega jer za učitavanje svake reklame, mora da se potroši malo struje, upozorava Kimkomando. Ako je reklama loše dizajnirana, ona može da potroši mnogo više nego što joj realno treba, piše b92.

Druge aplikacije koriste osvježavanje u pozadini, što znači da troše bateriju čak i kada je vaš telefon zaključan. Na kraju, tu su aplikacije za video-snimke koje troše mnogo struje jer je ekran sve vrijeme uključen i to često potraje i do sat vremena, pa i duže.

Ako tražite najveće krivce za trošenje baterije, to su sljedeće aplikacije: Snepčet, Facebook, Instagram, Jutjub, Netflix, Votsap, TikTok i Gugl Meps.

Pogledajte podešavanja

Ako vaša baterija ne traje cijeli dan, evo šta možete da uradite (samo na Androidu 9 i kasnijim verzijama).

Za početak, smanjite vrijeme nakon kojeg se ekran gasi.

Idite u Podešavanja i odaberite Display > Advanced > Screen timeout. Tamo odaberite neko kratko vrijeme (recimo, pola minuta).

Možete i da smanjite osvjetljenje ekrana. Prevucite sa vrha i pomjerite slajder. Možete i da uključite automatsku promjenu po potrebi, birajući Display > Adaptive brightness.

Na kraju krajeva, možete i da isključite zvuk i vibraciju tastature. Odaberite Sound > Advanced i pronađite opciju koja vam je potrebna.

Obuzdajte “gladne” aplikacije

Ako niste sigurni koja aplikacija pravi najviše štete vašoj bateriji, otvorite podešavanja i pronađite opcije za bateriju.

Onda odaberite Battery > More > Battery usage. Pod sekcijom koja prikazuje potrošnju baterije od zadnjeg punjenja vidjećete listu aplikacija sa procentima šta koliko troši. Nakon što ste saznali koja od njih troši najviše, možete jednostavno da ih koristite manje, osim ako znate da ćete telefon uskoro da stavite na punjač.

Takođe, možete i da ograničite aplikacije dok samo rade u pozadini. Idite u podešavanja i odaberite Battery, a zatim Restrict ili Background Restriciton.